政情：香薰油致敏 伍婉婷教咪貪平
唔少人都鍾意用香薰精油按摩、消除疲勞。灣仔區議員伍婉婷（Yolanda）平時工作壓力大，都有用開香薰。不過早前消費者委員會測試市面三十款香薰精油，發現全部樣本都至少有兩種香料致敏物，部分長期吸收可能影響中樞神經。Yolanda就唔驚，話最重要係仔細研究，唔好貪抵就買喎！
平時用嚟按摩驅蟲
Yolanda話，平時都有用檸檬草、薰衣草同鼠尾草等多人用嘅香薰精油，有時用嚟按摩，有時就燃點嚟淨化空間同埋驅蟲。有關香薰精油含致敏物嘅報告出咗後，佢請教過一啲香薰治療師，都話只要唔好過量就得。而佢都認為，只要仔細研究同跟足指引，唔好行過見到貪好抵，買啲冇牌子或冇成分標籤嘅就冇問題。
至於導致敏感，Yolanda就話每個人都可能對某啲嘢過敏，係咪病發就好視乎攝取量，所以佢都以平常心面對，唔會因為有關報告而唔用香薰精油喎！