政情：容海恩終認有咗「明年需要產假」

立法會仲有一個月左右就復會，其中一項排緊隊嘅議案就係男士侍產假由三日增至五日，之後政府仲研究緊將產假由十周增至十四周，相信唔少準父母都好期待。尋日論壇一開波，主持人就笑問Eunice：「依家台上係咪有六個人？」當時台上只有五人，等同問Eunice係咪懷孕喇！Eunice處變不驚，只係話遲啲大家會知。點知到咗尾聲，Eunice發言時就承認自己懷孕，引起台下一陣哄動。唔知佢係太興奮定太緊張，講到希望立法會可以提供十四周產假時，多次講錯成「十四日」，如果到時真係如佢所願，睇怕Eunice都唔知好嬲定好笑嘞！

留缺席紀錄 自稱「被剝削嘅一群」

問到預產期，Eunice就話：「今日講住咁多先。」但就呻話，目前議員若因為生仔而缺席會議，紀錄上面係寫住缺席，換言之即係冇產假，佢更直言自己係「被剝削嘅一群」。

佢話立法會冇理由自己都唔做，所以要為「被剝削嘅一群」發聲，例如要畀議員寫清楚缺席理由，等市民知道佢係生仔而唔係去咗旅行。不過為咗履行議員責任，佢話未必會放足咁長產假，到時視乎身體狀況而定。

同場仲有立法會批發及零售界議員邵家輝、婦女事務委員會主席陳婉嫻。邵話目前商界大部分傾向支持五日侍產假，市民唔可以只睇由三日增至五日，仲需考慮社會正爭取取消強積金對沖、增加僱主強積金供款、設立標準工時等，呢啲都會增加商界負擔。

至於陳婉嫻就強調增加產假同侍產假係社會趨勢，即使侍產假增至五日，日後仍會繼續爭取更多，批評邵嘅取態會令市民更加唔鍾意功能組別，仲教路話議員喺照顧所屬業界嘅同時，亦應當守護社會公義咁話。