中環出更：何君堯英國玩直播 叫錯陸頌雄名
立法會代表團一行十人，尋日啟程往英國進行為期五天嘅議會訪問。代表團下午到埗後，議員何君堯（Junius）喺英國做網上直播，指住一名高高瘦瘦男子話議員「陸頌榮」同佢一齊到白金漢宮外行公園，兼推介網民有時間都嚟旅遊喎。咦！但立法會好似冇一位議員叫「陸頌榮」喎，唔通Junius帶埋朋友去？
話同「陸頌榮」行公園
其實Junius不時喺社交網站開直播與網民交流，尋日佢做直播時先介紹白金漢宮，又講吓周圍好多遊客等緊睇英國御林軍交接。就喺直播期間，Junius突然指向身後一名男子話「陸頌榮」同佢一齊行公園，當大家都感到疑惑時，佢即刻講「唔好意思」係議員「陸頌雄」先啱，而「陸頌榮」係佢朋友，笑稱自己成日都嗌錯。
作為攝影發燒友嘅陸頌雄，應該唔知自己入咗鏡，好自然咁張開腳兼擺Pose，為求攞到個好角度影番張靚相。不過，其實兩人做咗咁耐同事，Junius都仲叫錯名，唔知係同「陸頌榮」好老友，抑或同陸頌雄好唔熟呢？
卓妮