孔夫子教落︰必也正名乎。好似律政司咁吖，應告嘅唔告，唔應告嘅亂告，最叻就係對反中亂港嘅牛鬼蛇神包庇縱容，唔少人認為應該正名為「亂政司」。又好似食環署咁，部分前線員工偷懶多過食飯，「蛇王署」可謂實至名歸！

呢嗱，話口未完又嚟喇。本報記者近日貼身直擊食環署油尖旺小販事務隊成員蛇王過程，明明規定食飯食一粒鐘，點知有人由黃昏六點開始，就喺寫字樓同一幢大廈嘅熟食中心打躉，唔單止有專人負責去街市買生猛海鮮，七丁友一食就食到十一點，期間忘情隊啤有之，大玩骰盅有之，甚至有人知法犯法，吞雲吐霧。最離譜嘅係，到咗埋單之時，食肆老闆同成班友攬頭攬頸，狀甚親熱，擺明係熟客，慌唔係有人偷懶偷到「街知巷聞」咩。

除咗食肆老闆同呢班蛇王老友鬼鬼，無牌小販亦對佢哋嘅「習性」瞭如指掌，事關每逢佢哋「同聚暢飲今晚夜」，紅磡站對出天橋及附近一帶無牌小販都會非常知碇，大舉出動做生意。不過計功夫茶話齋，攤販們未免高估咗小販隊嘅「膽識」。除非你係老弱病殘，否則以呢班港產城管欺軟怕硬嘅作風，都唔使擔心佢哋夠膽搵你哋祭旗交數。當然喇，如果想萬無一失，最好仲係移師深水埗「南亞村」大展鴻圖，包保冇食署惡吏敢埋你哋身。

有人就講得啱嘞，小販隊內部盛行埋堆及擦鞋文化，最興就係觥籌交錯圍威喂，奇就奇在班友飲到醉眼惺忪，腳步浮浮，之後返番寫字樓簽簿，當值上司居然視若無睹，話唔係有人隻眼開隻眼閉，三歲細路都唔信。

既然玩忽職守無王管咯喎，咁就難怪「蛇王症」好似風土病咁喺食環署內瘋傳。除咗小販隊，北區潔淨組職員亦好識「享受人生」，其中一支出勤隊伍每日實際開工個半鐘咁大把，其餘時間唔係行行企企，食飯幾味，就係將架車泊入掘頭巷等收工。最得人驚嘅係，早排本報揭發食環署防治蟲鼠組人員滅蚊Hea做，有人甚至全日零工作。喂，呢排登革熱爆到冚冚聲，咁搞法分明靠害市民啫！

講真，食環署「蛇滿為患」，只係成個特衰政府懶政不作為嘅冰山一角。香港郵政、房署、康文署、屋宇署等衙門，莫不蛇王輩出，「一官還有一官懶」，除咗本報持續踢爆，申訴專員公署同審計署亦多番狂炳，奈何官老爺意見接受，態度照舊，你吹得佢脹咩。

冇計喇，上樑不正下樑歪，弱將手下無強兵，做大嘅胡混度日，坐以待幣，做細嘅有樣學樣，青出於藍，香港想有運行都幾難！