政情：八網難逃：袁莎妮唔受天災影響 鹿兒島跳八月舞
日本近日接連有颱風、地震天災，好多港人都受到影響。去咗鹿兒島嘅香港總商會總裁袁莎妮（Shirley）前日喺社交平台貼咗一啲相，見佢着上當地特色服飾載歌載舞，笑得好開心，睇嚟行程應該冇阻滯。Shirley接受查詢時就報平安，話冇受到地震颱風影響。
和牛齋睇冇得食
Shirley係去參加兩年一度嘅香港鹿兒島會議，夜晚出席當地政府舉辦嘅酒會，大會安排香港嘉賓着上特色衣飾，齊齊跳鹿兒島轄下奄美島嘅「八月舞」。農曆八月係奄美島嘅新年，「八月舞」係慶祝、祈求豐收嘅舞蹈，藉此向神明表達感恩之情。
仲有其中一張相係Shirley望住十幾碟肥美和牛，睇嚟佢應該大快朵頤喇！點知佢話得個睇字，事關佢忙住同當地政府同埋商家交流，睇吓點樣進一步合作，將更多當地美食引入香港，所以食唔切，認真可惜。不過咁，如果佢成功促成合作，第日咪唔使專程去鹿兒島都可以大飽口福囉！