中環出更：鄺俊宇被認錯 變後生版盧俊宇
政界人士經常撞樣撞名，搞出唔少笑料。好似民主黨（白鴿黨）裏頭就出現咗兩個「俊宇」，分別係立法會議員鄺俊宇（Roy）同埋社區主任盧俊宇（Cary）。雖然兩個人姓氏唔同、樣貌亦有分別，但都依然會有街坊認錯，仲有人以為係前、後照添！
掛孖頭橫額 以為前後照
阿Roy唔止係立法會議員，本身亦係寫開愛情小說嘅作家，過去仲試過搞簽名會添！Cary透露，試過有街坊認錯佢同阿Roy，仲有人叫佢簽名添，認真搞笑。Cary話每次都會解釋番，話自己係彈琴嘅，同埋肥啲，而阿Roy就係跳街舞、寫小說同瘦啲嘅。
除咗叫Cary簽名，佢仲話本身有同阿Roy掛孖頭橫額，試過有街坊問佢係咪阿Roy嘅前後照，仲話左邊嘅係阿Roy嘅學生相，而右邊Cary個樣就係阿Roy嘅大人相添，聽到Cary都O晒嘴。佢兩個嘅名好似，而且年紀亦都差唔多，雖然一個有眼鏡、一個冇，但大家都斯斯文文咁，又好難怪街坊會認錯嘅。
卓妮