政情：公民講場：強積金回報微薄 黃友嘉死撐可觀

強積金唔經唔覺都推行咗十七年有多，一直都畀人鬧收費高、回報低，不過強制性公積金計劃管理局主席黃友嘉似乎繼續「睜眼說瞎話」。尋日（2日）佢喺網誌上話，強積金成立至今仍有十一萬個供款帳戶活躍，平均累積咗三十八萬港元，如果繼續累積將會係一筆可觀嘅退休儲蓄。查實三十八萬港元真係一啲都唔多，而且低過呢個平均數嘅大有人在。黃仲講到強積金免「入場費」好吸引咁，但實情係市面上嘅月供股票或月供基金計劃雖然設最低「入場費」，但回報就遠遠高過強積金。如果市民退休後靠強積金過世，恐怕會慘不忍睹，更何況黃似乎仲漏咗通脹未計呢！