政情：吳寶玲設計服裝須通曉歷史
唔少香港人鍾意「電視撈飯」，特別係古裝劇就更加深得一眾師奶喜歡。著名服裝造型設計師吳寶玲（Bobo）為唔少劇集同電影設計造型，佢慨嘆每套造型都好難做，因為係由零開始，係用服裝設計去製造一個世界出嚟，所以要通曉歷史，先至可以設計唔同朝代嘅服裝咁話。
注入新想法 締造與別不同
Bobo話，自己入行前已好喜歡歷史，睇過好多書，都記得唔同造型。例如金庸小說《書劍恩仇錄》內，人稱「翠羽黃衫」嘅霍青桐，經常一襲黃衫、帽插翠羽，Bobo笑稱「喺沙漠度有翠羽黃衫，幾肉酸呢？」所以佢要諗吓點樣設計套靚嘅翠羽黃衫，每次都要注入新想法，先會做到與別不同。
Bobo對於工作亦有份堅持，年輕時曾經學過染布，雙手毫無保護咁直插落染料度，搞到對手變得粗糙，自嘲「戴鑽石都唔靚」喎。