政情：誓保土地諮詢報告 黃遠輝公職作挾 拒做周永新翻版

港府表明撐填海造地

上屆政府曾經委託周永新進行退休保障研究，周最後提出不論貧富嘅「全民養老金」方案，點知當年身兼扶貧委員會主席嘅時任政務司司長林鄭月娥拒絕接受，事件轟動一時。現為特首嘅林鄭去年成立土地小組，聲稱要社會嚟個「土地大辯論」，諗吓有咩增加土地供應嘅選項。不過，嚟到大辯論尾聲，政府似乎「故態復萌」，未等土地小組呈交初步觀察報告，就率先表明力撐填海造地，其他選項都聽唔入耳。

雖然政府力推填海造地，但土地小組一日未埋單計數，支持同反對嘅比率根本冇人知。話口未完，黃遠輝尋日就透露，按目前收集到嘅意見，較清晰嘅選項有三至四個，當中以發展棕地較少人反對。黃續指，在短中期嘅選項來說，大家都認為需要處理棕地，亦需要透過如何妥善安置棕地上嘅作業者，繼而釋放部分土地潛力。以目前而言，短中期只能釋放到約百分之十五嘅棕地，即七百六十公頃棕地之中，大致可以做到一百一十公頃，而中長線則可以做多二百二十公頃。

指主流選項發展棕地

黃遠輝講到咁白，即係發展棕地成為土地供應嘅主流選項，甚至是結論，而外界亦質疑林鄭會否「重施故技」，輸打贏要，拒絕唔啱胃口嘅土地小組報告結果。據悉，黃遠輝亦擔心自己變成「周永新翻版」，被人用完即棄，所以警告假如政府無視土地小組報告結果及建議，佢以後將會拒絕擔任公職。

銀行家出身嘅黃遠輝外號「公職王」，多年來出任多個諮詢委員會公職，公職主要涉及土地房屋範疇，包括房屋委員會資助房屋小組主席、市建局非執行董事，另身兼環境諮詢委員會主席、博物館諮詢委員會主席，以及離職公務員就業申請諮詢委員會委員等。早前政圈流傳運輸及房屋局假如拆局，黃就係房屋局局長人選，但假如黃被用完即棄，睇怕想佢入熱廚房都幾難喇。