中環出更：重返政府？ 張雲正冇落閘拒絕
公務員事務局前局長張雲正喺政府換屆之時，決定唔留喺「熱廚房」，近日獲委任為保險業監管局（保監局）行政總監。早前佢帶同太太Florence出席一個活動時，被問到點解重投工作，Florence笑住搶答話「因為喺屋企怕咗老婆」喎！張雲正就解釋話係考慮到媽媽嘅情況，目前只敢接較短期嘅工作。咁日後有冇機會重返政府？佢就話唔知。似乎都冇落閘拒絕喎！
保監局彈性大 方便照顧媽媽
張話當日唔留喺政府原因係要照顧媽媽，若留低就要做足五年，如果中途轉工就會引發外界嘅聯想。去年底，不少保險業界同佢講，希望可以去保監局幫手，佢認為若應徵後一旦兼顧唔到屋企，最終唔做都會有其他人選可以勝任，於是就一試，並非一早計劃好要做嘅。佢強調份工只有兩年合約，若媽媽情況有變，三個月通知即可以走，彈性大啲。
佢又話，依家請到一個好好嘅新工人，同媽媽情同姊妹，加上太太好錫媽媽，得閒會去上水買腐竹、豬手畀媽媽食，所以佢嘅壓力細咗好多。聽落真係戥佢開心！
卓妮