中環出更：陳李妮任囡囡發展 品德好做農夫都得
啱啱升呢做媽媽嘅博愛醫院前主席陳李妮（Lily）上星期返港之後，即刻好活躍出席大小活動。前日出席瓊港青年音樂會港區選拔賽做評判，尋日又出現喺沙田馬場，開口埋口都係講BB經，直情係幸福寫喺臉上。問佢對囡囡未來嘅發展有咩期望，Lily直言品德最重要，希望囡囡識得做人，其餘就任佢自由發展，做農夫都冇問題喎！
Lily笑笑口話，囡囡仲好柔弱，所以要慢慢同小心照顧，結果BB未夠兩個月大，佢已經有「媽媽手」，如果唔使抱BB時就要擦按摩膏。講起湊B嘅挑戰，佢話唯一係餵奶要快，因為怕餓親佢。卓妮見Lily身形好苗條，完全冇產後修身嘅煩惱，佢就話喺美國待產時支援較少，好多嘢要親力親為，所以並冇增太多磅，但係自己都貪靚嘅，所以仍要繼續努力咁話。
講番音樂會，做評判嘅仲有樂兒計劃成長基金前主席李煥明（Wendy）、全球華語金曲獎主席向雪懷，博愛醫院永遠顧問湯修齊亦有現身支持，勝出嘅年輕人有機會獲贊助出席於海南舉行嘅音樂交流活動。
李煥明撐有才華基層青年
本身係資深IT人嘅Wendy熱愛音樂，多年嚟創作唔少歌，又會同朋友夾Band。佢話平日作曲要睇目的，如果為電影作曲就要睇劇本搵靈感，亦會善用電話錄音功能，將當刻諗到嘅音樂立即記錄下來。佢認為，依家嘅科技對音樂愛好者幫助好大，一來比以往更容易發布作品，同唱片公司聯絡時亦方便咗。不過佢都見過有青年因經濟問題而放棄音樂夢，所以特別希望支持有才華嘅基層青年。
卓妮