政情：講錯颱風名 陸頌雄被恥笑
超強颱風「飛燕」預計稍後吹襲日本，勞工界立法會議員陸頌雄急市民所急，前晚喺網上率先討論呢個風，仲聲稱自己早過天文台「偷步」發出熱帶氣旋警告添。不過，行得太快未必係好事，皆因佢將個風叫「燕子」，但係天文台叫個風做「飛燕」，搞到佢被網民恥笑搞錯颱風名。
稱「偷步」用台灣叫法
本土派劉頴匡喺陸頌雄度留言挑機，指陸「連個風個名都錯」，陸頌雄其後解釋，話個風喺台灣叫燕子，香港天文台就叫飛燕，由於佢哋「偷步」早過天文台已經講起個風，所以參照咗台灣個名。不過，劉仲唔肯收手，話天文台一向有提供熱帶氣旋嘅名字列表，陸就回應一句「謝謝提供」。
香港人對打風一向敏感，颱風路徑預測更加係網民討論嘅熱門題目，陸頌雄亦參與埋一份，話個風唔會打到嚟香港，仲叫打工仔唔好咁大期望有風假添，但就提醒喺日本玩緊嘅朋友要留意航班喇。