政情：樹根喬寶寶飛昆明「明張目膽」睇靚女
前立法會議員鍾樹根（樹根）卸任議員後，專注喺內地投資農業，經常要中港兩邊走。前日佢又出發去雲南昆明，仲要同埋藝人喬寶寶一齊搭飛機添！究竟佢哋搞邊科呢？樹根就話，佢哋係去昆明睇靚女喎。咁「明張目膽」，唔通佢唔怕被老婆扭耳仔？
獲邀做選美比賽評審
樹根話，以前搞活動都有搵喬寶寶表演，今次佢同喬其實係應邀擔任喺昆明舉辦嘅一場選美活動嘅評審委員，所以大會就請佢哋一齊搭飛機，佢亦出席咗呢個比賽好多次喇，真係名正言順睇靚女。佢仲話，呢個選美活動唔止有中國佳麗，仲有來自東南亞等外國美女，都幾令人期待。
被問到公然去內地「(目及)女」，老婆會唔會詐晒型先？樹根就話佢老婆不知幾後悔，因為好想跟埋佢去昆明，但一早應承咗要去老人院唱粵曲同幫啲公公婆婆剪髮，只好留喺香港。不過，樹根都好識做，話尋晚係活動嘅決賽，今日就會即刻飛返香港陪老婆喇。