中環出更：張宇人「下戰書」返港再為侍產假駁火？
政府計劃將男士侍產假由三日增至五日，立法會飲食界議員張宇人（Tommy）隨即連珠炮發，鬧到拆天話勞工界無限苛索，嚴重影響業界，唔好以為過咗一段時間，Tommy就收晒火，事關佢要去旅行充電，並同老婆慶祝結婚四十六周年，而Tommy近期已喺Facebook留言，疑意有所指話「回來再繼續迎接各項挑戰」，唔通佢預告返港後再為侍產假同議員繼續開火？
歐遊慶結婚周年
立法會正在休假抖暑，Tommy早前同太太去咗歐洲玩，佢喺Facebook上載嘅幾張相，見佢好輕鬆，喺里斯本嘅堡壘前留影，又歎葡撻，去到荷蘭仲喺風車前拍照，喺河畔食午飯，仲參觀埋牛場添！
Tommy跟住仲爬上棵大樹讚棵樹好香，又去埋葡萄園，攞住啲葡萄話九月就可以摘嚟釀酒，睇嚟佢都好期待。不過，上述一切景點都只係「配菜」，「主菜」係佢同太太慶祝結婚周年，兩公婆仲一齊切蛋糕慶祝添。
卓妮