中環出更：同陳正欣由細玩大 林宣亮：睇住佢壞
今時今日，個個都慨嘆鄰里關係愈來愈淡薄，唔似以前咁有人情味。早前在一個場合見到香港鐘表業總會前主席陳正欣（Daniel）同潮州商會會長林宣亮（Alfred），Daniel自爆同Alfred相識幾十年，事關佢同Alfred弟弟林宣中係幼稚園同學，後來大家為學業及事業各自奔波，廿年前先至喺商會重逢，真係有緣分。
Daniel話，當年佢住喺天后附近，學校就在司徒拔道，一見到Alfred就自不然諗起嗰段童年快樂時光。咁兩名小豆丁有冇試過想跟大哥哥去玩，但係大哥哥唔畀跟？Daniel笑笑口話冇，Alfred好鼓勵弟弟同佢玩就真！Alfred都笑稱係「睇住佢大、睇住佢壞」喎！唔通大家細個有咩反斗事迹？Alfred就話冇，大家都好乖，佢講吓笑啫！
胡劍江同家人出埠歎世界
當日係潮商換屆選舉晚宴，胡劍江（Michael）卸下會長職務，佢笑稱有理冇理都要即刻出埠去輕鬆吓，同媽媽、太太及妹妹一齊坐郵輪去地中海歎世界，今次子女冇得跟，因為已經開學。至於日後多咗時間，胡會專注於自己專業嘅珠寶及高科技行業，以及繼續推動校園品德教育同埋慈善工作。
正當大家享受美食時，卓妮見副會長鄭敬凱、常董蔡少偉同會董林月萍企埋一邊密密斟，原來講緊做善事。鄭敬凱話，佢哋獲悉中西區鄰舍輔導會嘅長者宿舍風扇殘舊，所以就合力捐贈二百七十幾把風扇，希望長者喺熱辣辣嘅夏天，都可以享受些少涼意。
卓妮