食物及衞生局局長陳肇始取消休假，提早喺日前返港處理蚊患問題，點知尋日去長洲做滅蚊，申訴專員公署就發火，狂轟食環署管理公眾街市不力，唔單止租務同前線管理錯漏多多，有街市同場唔同租，仲形容有啲街市做咗迷你倉，有啲街市唔租攤檔拍烏蠅咁，搞到要以公帑補貼。話時話，陳肇始趕返嚟做番場滅蚊騷，諗住可以贏吓掌聲，勢估唔到食環署日前被踢爆蛇王，滅蚊懶懶閒，跟住被插爆街市管理不善，相信佢都始料不及，依家咁多火頭睇佢救得邊度？
