政情：劉聖雪自爆 落區忘記街坊名
各個政黨都積極培養政治人才，希望可以擴大政治版圖。好似新民黨嘅「小花」劉聖雪（Dana）已經喺太古康山做咗一段時間嘅地區工作，上手未呢？佢就自爆曾經試過有一個中年婦人講笑咁投訴：「劉小姐你都唔記得我嘅！」場面有啲尷尬，不過Dana都承認記得人名可以令人感覺親切好多嘅。之不過，一個選區至少都過萬人，點可能記得晒所有街坊嘅名呢？
Dana仲話葉劉對佢哋呢班新人嘅地區工作好上心，就算只係搞一場電影分享會，葉劉都會打電話問吓順唔順利、市民反應點等等，又大讚葉劉記性非常好，記得晒佢哋啲社區幹事嘅名同搞過乜嘢活動添！
透露梁兆新睇住佢大
距離區議會換屆仲有一年幾時間，Dana仲未決定會唔會參選，但佢透露細細個嘅時候，其實同當區現任區議員、公民黨嘅梁兆新一齊做過賣旗等社區服務，又試過成家人一齊同梁去一日遊旅行，所以梁都可謂「睇住佢大」，而轉眼間原來梁已做咗近二十年議員嘞！