運輸署豪花二十萬元喺屯門友愛邨附近以岩石鋪砌幾座小丘園境如同「山墳」，以阻截聚賭，結果劣評如潮惹嚟地區人士炮轟。有關部門事後亦「知衰」，尋晚屯門區議員葉文斌發現當局已經極速「拆墳」，改為放置花盆。
友愛邨近翠寧花園皇珠路嘅入口，原本位於花槽同輕鐵路軌間嘅兩座建造中的石造「山墳」已被拆毀，一塊塊岩石被擺放喺花槽旁邊，而「山墳」原本嘅部分空間，則擺放咗三個巨型花盆。「山墳」所在位置經常被街坊投訴有人聚賭，運輸署為咗阻止有關情況，喺八月上旬展開工程，聲稱用岩石鋪砌出小丘園境，仲話一向喺行車天橋底都會有，但結果就變咗「山墳」。相信今次「拆墳」係政府都「知衰」，所以急急腳補鑊嘞。
