政情：政府醜聞拖累 雙料議員張國鈞 黃國健 民望包尾
政府滅蚊不力，令登革熱大爆發，加上港鐵沙中線工程醜聞一單接一單，政府處於弱勢唔使講，就連身兼行政會議成員同立法會議員嘅「雙料議員」民望都受拖累。根據香港研究協會最新民意調查發現，分別屬立法會港島區及九龍東嘅「雙料議員」張國鈞（Horace）同黃國健（KK）就喺所屬選區評分包尾，只得一點九一分同二點二二分，兩人評分均下跌咗零點二二分，真係多得政府唔少喇！
協會喺八月一日至廿八日訪問咗近一千一百名十八歲以上市民，邀請佢哋為立法會直選議員及有「超級議員」之稱嘅區議會（第二）功能界別議員評分，一分為最低分，五分為最高。Horace同KK都分別喺所屬選區包尾，而同樣係行會成員兼港島區立法會議員嘅葉劉淑儀（葉劉），評分亦都跌咗零點一九分至二點四九分。
而同葉劉同屬新民黨嘅立法會議員容海恩今個月啱啱結完婚，評分就微升零點零五分，不過仍然喺其所屬嘅新界東包尾。而喺九龍西及新界西包尾嘅議員就分別係蔣麗芸同鄭松泰。身兼離島區議員同立法會議員嘅周浩鼎得分為二點二六分，係五位「超級議員」中評分最低。
譚文豪評分跌最甘
立法會議員田北辰評分為三點三一分，係是次調查中評分唯一過三分嘅議員。評分下跌最多嘅係跌咗零點四二分至二點四二分嘅譚文豪，而評分升幅最大嘅係議員梁志祥，上升咗零點三八分至二點四五分。
KK就唔認為自己評分下跌係同近日沙中線等事件有關，因為政府已成立調查委員會調查，有關方面亦有喺技術上作補救，依家講沙中線嘅都係「炒作」。佢反而覺得喺香港好多時「講咗當做咗」，但入咗行會後多咗政治包袱，好多議題唔可以暢所欲言，所以就低調咗，少就時事議題評論，知名度同支持度都會下跌喎。
Horace亦都話評分下跌未必同佢做行會成員有關，事關有其他非行會成員如泛民議員評分下跌得仲多，自言最近工作同過去冇大分別，落區方面冇疏懶到，亦冇重大事件發生喺自己身上，所以都要深入研究一下。佢又話該民調訪問咗一千多人，即五區每區二百多人，如受訪人數多啲，參考價值會大啲，但強調所有民調都有參考價值，可以鞭策議員，令議員再勤力啲咁話。KK同Horace都耍手擰頭話自己評分下跌係唔關政府醜聞事，唔通做行會成員真係唔同啲？