中環出更：啟明過大海 寸大三巴觀音像落伍
仲記得政府喺舊年公布高鐵一地兩檢方案後，工聯會嘅立法會勞工界議員何啟明特登上咗轉廣州，仲喺Facebook打卡，上載咗一張食「細蓉」嘅相，證明使用本地電話卡即可喺內地登入唔同網站。可能見呢集《小明上廣州》都幾受落，佢近日又嚟多集《啟明過大海》，又寸嘴咁話：「仲去大三巴觀音像就out啦！」
吃貨上身 大讚水耕沙律
過大海即係去澳門，何啟明咁寸嘴，究竟發掘到乜嘢新景點？竟然係澳門嗰邊的工聯驛站。上次佢去廣州就食勻街邊小食，咁喺澳門嘅工聯驛站又有乜特別之處？都係同食有關，佢坦言今次又係吃貨上身，話喺驛站嘅canteen試咗自家水耕種植嘅沙律，仲大讚既fresh又健康添！跟住又去咗飲食服務廚藝培訓中心，見到班小廚神，個個都煮得有板有眼喎。係咪賣花讚花香咋！
剩係掛住食？咁又唔係，佢仲記得啲重要任務嘅，就係打工仔權益問題。佢同一位同樣係80後嘅澳門立法會議員李靜儀討論港澳兩地勞工問題，包括澳門本地勞工被僱主壓價，特別係飲食業，往往將管理階層嘅職位提供畀非本地人，令打工仔難搵食。
卓妮