中環出更：劉詩昆手震半世紀遭戲稱全天候演奏
雙手對每個人都有不同意義，而對演奏樂器的音樂家而言，雙手珍重如命。卓妮近日喺一個活動上見到「鋼琴大師」劉詩昆雙手竟然不斷震，好擔心佢會唔會影響表演，但佢嘅另一半「鋼琴公主」孫穎笑稱，劉自三十歲起就開始手震，「震咗半世紀」，但每次上台彈琴都好穩定，有外國傳媒亦戲稱劉雙手全天候演奏添！
孫穎又話早前喺上海出席一個活動時，現場唔少鋼琴家向劉詩昆請教，話雙手一上台就震，問點樣控制到唔震，點知劉好調皮咁笑咗一下，不發一語就離開。兩人嘅愛徒王紫驕在旁打趣話，劉老師近日愛睇內地短視頻APP「抖音」，可能因為咁睇到手都「抖」，佢更大爆劉每次睇完視頻，只關注有幾多人睇過同一短片喎。
謝德新公餘鍾意做運動
反觀做開手術嘅心臟科專科醫生謝德新，佢雙手就好穩定。問起平時有無特別方法訓練？佢就話係工多藝熟，大讚公立醫院係醫生訓練場，可能有啲人天分好，但離唔開都係要靠練習，咁有前輩傍住練得多手就定。至於公餘時間，佢最喜歡做運動，因為要保持身形，先有「牙力」叫病人減肥，而佢亦識少少彈吉他，有時會同朋友夾Band，不過就強調「彈得好渣」，只係玩吓咋！
通訊事務局主席譚允芝亦彈得一手好鋼琴，佢日前帶同女兒莫曉霖出席活動時，大讚女兒精通拉小提琴，係音樂家，有時候兩母女會喺屋企「Jam歌」。問到會唔會畀女兒繼承衣缽做律師，譚允芝即刻話一定會叫佢諗清楚，最緊要佢可以做自己喜歡嘅事。
卓妮