爸爸公幹回家，兒子小忠就問︰「手信呢？」
爸爸︰「手信？我叫你幫我睇住盆花，有冇好好打理先？」小忠答︰「緊有啦，日日都有淋水，你睇。」
爸爸一看花盆底︰「搞錯呀！個花盆底盤積晒水又唔換，好易孳生蚊蟲o架！」小忠︰「畀蚊叮兩下啫。」
爸爸︰「你有冇留意新聞，有冇聽過登革熱呀？病徵包括高燒、嚴重頭痛、眼窩後疼痛、肌肉關節痛、嘔心、嘔吐、淋巴結腫脹及出疹。最麻煩係有啲人感染後可以無明顯病徵，但如果引起重症登革熱，嚴重嘅話可致命o架。而登革熱嘅潛伏期係三至十四日，所以一定要小心處理。」
小忠問︰「咁恐怖，但咁同畀蚊叮有咩關係？」爸爸答︰「登革熱係透過帶有病毒嘅雌性伊蚊叮咬而傳畀人類，當患者畀病媒蚊叮咬，蚊就帶有病毒，如果再叮咬其他人，就有機會將病毒傳播開去。」
小忠︰「咁除咗清理花盆積水，仲有咩預防方法？」爸爸︰「喺屋企可以做嘅預防措施，包括緊蓋儲水器皿、確保冷氣底盤無積水、妥善存放食物、將用完嘅罐同樽放喺有蓋垃圾桶，同埋定期清理垃圾。」
小忠︰「其實唔難啫！我一陣不如落街買支蚊怕水返嚟噴吓！」
爸爸︰「咪亂買，屋企有年紀仲細嘅你，仲有懷孕嘅媽媽，買蚊怕水都要注意吓避蚊胺濃度。孕婦同兒童使用避蚊胺濃度上限分別係百分之三十同百分之十，六個月以下嬰兒就唔好使用含避蚊胺蚊怕水喇！」
職業安全健康局
www.oshc.org.hk