政情:黃程鋒鼓吹港大生造反 想做梁天琦馮敬恩二世?

香港大學嘅學生近年成為社運嘅活躍分子,唔少仲係帶頭衝嘅領導人物,好似衝擊校委會會議嘅港大學生會前會長馮敬恩、參與旺角暴亂嘅本土民主前線前發言人梁天琦,同埋參與違法佔領行動嘅學聯前秘書長周永康,佢哋三個先後惹上官非,梁天琦更加被判入獄六年,新任港大學生會會長黃程鋒似乎冇有怕,仲同新生講要有造反勇氣,唔應該向社會常態妥協。唔通佢想變梁天琦、馮敬恩二世?

港大尋日舉行開學禮,學生會會長黃程鋒一如慣例上台致詞,佢致詞時語重心長咁提醒新生要有勇氣,希望新生要有心理準備,做港大嘅學生並唔容易,要經常面對社會爭議,社會人士亦都期望港大學生要貢獻社會。

形容兩人係英雄

黃程鋒形容社會嘅高期望本身並冇問題,但唔認為學生要完全遵從社會嘅規範,反而要不斷有懷疑心態,甚至重新編寫社會規範、塑造社會(mould the society),因為未來係喺年輕人手中,港大永遠唔應該向社會常態妥協,應該要有造反嘅勇氣(rebellious courage),先可以捍衞港大尊嚴。佢仲話周永康、梁天琦同馮敬恩等人都喺港大畢業,形容佢哋係「英雄」,期望呢一代有更多「英雄」。

之不過,依家梁天琦正在服刑,周永康亦因喺一四年違法佔領行動中衝擊政府總部東翼前地因而入獄,而馮敬恩亦因圍堵校委會會議被判二百四十小時社會服務令,唔通黃程鋒想學呢班「前輩」,嚟緊諗住幹一番大事、做番個「英雄」?抑或會步其後塵?大家真係要拭目以待。

張翔上任重溝通

除咗黃程鋒,港大新任校長張翔亦都有喺開學禮致詞,佢形容自己同在座學生一樣,都係「freshman」(新鮮人),佢鼓勵大學生眼光要更大,唔好只着眼於事業發展,而係要思考大學生活可以做嘅事,鼓勵港大學生要勇於追夢同創新。

張翔仲話重視同學生嘅溝通,上任初期首先要做嘅工作就係同唔同學生組織代表見面,包括港大學生會。佢寄語學生,思維要跳出框架,保持創新,不斷發掘新事物,走出自己嘅「舒適地帶」。

第一手消息請下載on.cc東網iPhone/iPad/Android/Windows Phone Apps