政情：葛珮帆想去厄瓜多爾睇動植物
立法會議員葛珮帆（EQ）已經去過六十幾個國家，連南極同非洲都去過嘞，佢依家最想去委內瑞拉睇瀑布同去厄瓜多爾加拉巴哥群島睇特別嘅動植物，但一去就要去好多日，擔心立法會工作忙碌，行唔開咁耐呀。問佢不如退休先去？佢就話擔心到時已經冇足夠嘅體力去啦，以前去南極，事先都操咗兩年體能先頂得住呀！
赴愛爾蘭考察 順便自由行
原來一啲聽落較為熱門嘅國家，EQ反而未去過，例如佢下個月將會自費去以色列同愛爾蘭考察同出席會議，笑指因為係自費，所以丈夫會全程陪佢一齊去，仲會喺愛爾蘭留多一個多星期，駕車自由行，浪漫一番咁話。
EQ話將會跟財政司司長陳茂波去以色列睇科技，又會自費代表立法會去愛爾蘭，出席會議商討女國會議員的角色，點樣推動婦女權益等，更會再留多幾日去考察當地智慧城市嘅發展。