政情：架空屯門區會起「山墳」建制泛民鬧爆運署
今個月係鬼節，而近日喺屯門友愛邨翠寧花園皇珠路入口附近就突然有多咗幾座「山墳」，咁邪？其實當區居民完全唔知呢啲「山墳」係咩嚟，但就相當反感，原來嗰個位置早年經常有人聚賭，引起區議員提議改建甚至圍封，最終運輸署喺一年前左右承諾會興建花槽，豈料近日竣工就變咗「山墳」，附近兩名區議員包括工黨嘅譚駿賢同民建聯嘅葉文斌都大為不滿，大鬧運輸署架空區議會，自作主張，浪費金錢。
譚話好耐之前已促請政府跟進嗰個位置聚賭問題，一度建議改建成單車泊位，後嚟因為其他區議員反對而告吹，改為接受運輸署話起花槽嘅方案，但最終「花槽變山墳」當然係不能接受啦！譚隨即搵當區嘅民政事務處了解情況，得到嘅回覆係該處都唔知情，事關用嘅唔係區議會嘅錢，譚就估計係運輸署同路政署嘅主意，為咗唔想又起又拆浪費啲錢，嚟緊惟有睇吓可唔可以喺「山墳」上加工，等佢變番真真正正嘅花槽。
運署稱是小丘園境
運輸署回覆時承認「山墳」為咗防止聚賭而建，原意係用岩石鋪砌小丘園境，喺今年8月上旬開工，目前仍在工程當中，造價預計約20萬港元。
葉都直言呢個設計「真係好肉酸」，仲話區議會對此全不知情，大鬧政府冇做諮詢。葉尋日落區時仲撞到運輸署同路政署人員視察，當場質問佢哋，但佢哋都答唔出呢個「山墳」究竟係咩嚟，目前基於社會上有反彈，「山墳」將會停工，至於之後點善後就未知喇！