政情：林鄭捱轟即縮 又要特首辦補鑊
香港特首林鄭月娥疑捱轟後即縮，特首辦又要為其言論補鑊！話說澳門前日公布即將成立維護國家安全委員會，反觀港府自從二○○三年就《基本法》第二十三條立法觸礁後，束之高閣至今仍無下文。林鄭尋日朝早出席行政會議前，被問及會否倣效澳門有關做法時稱，第二十三條工作係不能迴避，並提及「亦都有啲工作依家進行緊」，重申會審時度勢，喺一定條件及環境下，呢個工作係會啟動。
「工作進行緊論」遭泛民質疑
林鄭嘅「工作進行緊論」曝光後，隨即遭到泛民議員質疑，話二十三條立法係全城都關注嘅問題，林鄭有責任開誠布公，唔可以含糊其詞，而事隔六個多小時後，特首辦幫林鄭補鑊澄清，「工作進行緊論」唔係涉及二十三條本地立法，亦與任何前期工作無關，聲言所指嘅係政府擬禁止民族黨運作嘅工作。
話時話，涉及維護國家安全問題係大是大非問題，若然港府高官予人取態左閃右縮，最終結果只會係左右不是人，遭到各方猛烈抨擊。