政情：美指控華侵權 戴澤良斥惡人先告狀
中美貿易戰已持續一段時間，美方嘅態度似乎愈嚟愈強硬。早前喺一個活動上見到國際華商協進會永遠榮譽會長戴澤良（Tony），佢講起美國總統特朗普發起貿易戰嘅理據之一，係要懲罰中國「竊取」知識產權。但係佢過往三十幾年做家庭用品、相機等產品出口到美國嘅生意，實際嘅經驗同美方指控啱啱相反，話都唔知「誰侵誰的權」，諗番都覺得唔忿氣。
逼廠商無償交出知識產權
Tony話中美貿易進行三十幾年，只有寥寥可數嘅竊取知識產權個案被成功定罪。大多數情況係美國採購商向內地廠家落柯打時，只提供產品嘅規格、設計等要求，有些甚至直接購買中國廠商設計和製造嘅成品。接獲訂單嘅廠商通過製造而對產品進行設計上嘅改進、決定使用適合嘅物料、對產品功能加以改善等工序，一旦產生咗專利，合約上訂明最終歸美國採購商所有，廠商只能無償交出知識產權。
佢認為中國廠商喺知識產權方面一直都好被動，依家掉番轉被指控為竊取者，確實令人不服。佢建議日後廠商要加強保護同註冊自己喺開發及製造產品過程中得到嘅知識產權，唔好再無償交出。