政情：丁煒章愛食月餅 寧做運動唔戒口
中秋節臨近，唔少人已經開始食月餅，嚟緊仲係大閘蟹季節，真係諗吓都想食。香港工業總會轄下嘅香港優質標誌局主席丁煒章都話自己係「月餅粉絲」，最鍾意食傳統冇蛋黃嘅蓮蓉月餅，後生時最高峰試過每日食一個添！不過依家就食少啲，但佢笑稱情願做運動都唔想戒口，事關月餅同大閘蟹真係太好味咁話！
配埋茶唔怕滯
丁話依家大概一個星期食一個月餅，為咗健康，都有物色過低鹽、低糖及低油嘅月餅，但要一樣咁好味嘅就仲搵緊。食咁多月餅怕唔怕滯啊？丁就話完全唔會，以前後生時會飲水、汽水或牛奶嚟送月餅，依家就改飲茶，聲稱從來都未試過食滯咗。
不過佢承認一驗身就會「現形」，所以有時間就會去游水，到咗月餅同大閘蟹季節就更加要游得密啲，仲話為咗好食嘅食物要付出多啲喎，真係搞笑。