政情：荒廢電郵錯失良機 陳穎欣後悔不已
現今即時通訊軟件流行，但仍然唔能夠取代電郵嘅角色，因為唔少文件、公事都仲用電郵進行溝通。如果唔及時閱讀任由電郵荒廢，分分鐘錯過重要資訊，好似深水埗區議員陳穎欣近日就吸取到教訓，相信日後會勤力去檢查電郵喇。
考試答案本可做範文
話說陳正在修讀法學碩士課程，早前要報考試，所以登入無檢查一段時間嘅電子郵箱，當中已經積存咗超過七千封未讀郵件。要搵番相關郵件猶如大海撈針，佢一輸入關鍵字搜尋吓，先發現之前嘅考試答案被揀中做範文，咁大驚喜都未反應過嚟，就發現自己已經錯過咗回覆校方嘅期限，即係同呢個難得嘅機會擦身而過。
不過，最令佢激氣係竟然仲有兩科出現同樣情況，而且過期仲耐添！難怪佢都忍唔住要放上Facebook，大嘆今次係只睇工作電郵嘅後果，仲提醒朋友搵佢唔好用電郵喎！