政情：嫻姐慨嘆 議員非職業 產假靠自製
早前立法會難得有喜事，因為立法會議員容海恩與同黨嘅政策總裁袁彌昌拉埋天窗，而政圈更盛傳佢哋奉子成婚，真係喜上加喜，不過就惹來外界對立法會議員有無產假放嘅關注喇。婦女事務委員會（婦委會）主席陳婉嫻（嫻姐）就大嘆，議員既冇產假，亦冇病假，基本上議員唔算係一份職業添！唔知佢會唔會幫容海恩去爭取婦女權益呢？
如果容海恩真係奉子成婚，就會成為首位任內生小朋友嘅女性議員，不過立法會秘書處早前就指，議員酬金及津貼制度唔包括分娩假期或者侍產假，即係不論男或女議員，屋企新添成員都一律無假放，意味住任內升呢做爸爸嘅議員郭偉強、周浩鼎等，都一樣無法享受法定嘅三日侍產假。不過咁，議員只要有合理解釋，就可以自己放自己假，一樣照出糧，最多只係被記錄缺席，做吓懶蟲啫。
稱當年患癌抖一個月即復工
曾任廿年立法會議員嘅嫻姐就認為，議員並無僱主，而且做得議員都唔會諗假期，即使要放假，假期長短都係自行決定。所以議員基本上唔算係一份工作，如果想搵工嘅人就千祈咪諗住做議員，因為絕對唔好打喎。佢仲話如果認為遇上好關注嘅議題，就算瞓喺床度都一樣會堅持去開會，當年佢患上癌症時，都只係抖咗一個月，一覺得身體可以就選擇復工。吓？以佢咁嚴格嘅標準，睇嚟想靠佢爭取產假都好難喎！
不過嫻姐都心軟嘅，雖然佢對自己攞病假一事相當嚴謹，但佢都話生完小朋友點都需要有產假。不過佢承認立法會好難喺呢方面作出改變，所以安排產假畀議員難度好高。
嫻姐上任婦委會主席不久，曾經喺電台節目上表明要盡快改善婦女產假政策，好似放產假期間可獲發全薪、增加產假等，睇嚟容海恩呢個潛在例子，都可以提醒嫻姐現時嘅產假制度有咩不足。至於容如果真係喺任內生小朋友，雖然未有產假放，但只要有交代，知會立法會有關人士，都唔怕冇得休息同埋湊吓BB嘅。或者復會後一旦通過增加侍產假嘅話，佢老公起碼會多兩日假，幫手換吓片喇！