中環出更：謝偉俊自爆做過薄餅店大廚

立法會議員謝偉俊（Paul）本身係律師，亦曾經做過旅遊界議員，原來佢唔止涉足政界、法律界同旅遊界，飲食界對佢嚟講都唔陌生。早前佢出席一個有關推廣美食嘅活動時，就自爆喺澳洲留學期間，曾經喺一間薄餅店打工，仲一度做到大廚添！

阿Paul曾經喺悉尼讀書，當時佢就喺當地一間薄餅店打工，由低做起，慢慢成為大廚。學生哥打工打到變大廚？佢都算厲害。阿Paul仲教路話，整薄餅係有獨門秘技嘅，最重要係材料分量要落得啱，同埋要睇火候。講咗好似冇講咁，莫非佢收埋份「秘笈」唔肯公開？

被問到依家仲有冇煮嘢食，阿Paul就話議員工作好忙，已經好少下廚，平時做完嘢返到屋企，都係求其煮個即食麵就算。加上自己煮小菜並非能手，所以就算放假，佢都係出街食比較多，但就強調唔會「掃街」幫襯街邊檔小食喎！

卓妮