中環出更：16年冇走樣 梁栢賢似食防腐劑
香港爆發登革熱，感染嘅個案不斷上升，相關嘅部門當然要出嚟交代吓事態發展。醫院管理局行政總裁梁栢賢（PY）早前喺Facebook上載咗張相，係○二年佢喺衞生署副署長任內，就登革熱公開現身作交代。睇番張相，啲網友反應好大，有人仲問：「你食開嗰隻防腐劑係咩牌子？」認真搞笑。
十六年前嘅PY同依家個樣分別唔大，只係額前嘅頭髮冇以前咁厚。正當佢可能喺度慨嘆時光飛逝之際，唔少網友就唔覺得佢老咗，有人留言話佢以前好似戴咗假髮咁，依家型好多；亦有人讚佢冇走樣，甚至愈嚟愈後生添！
沈運龍種香料防蚊
講番登革熱肆虐，住喺村屋嘅人就更加擔心，雖然依家登革熱主要喺長洲同埋獅子山公園一帶，但十八鄉鄉事委員會主席梁福元就話唔可以掉以輕心，遲啲都要開會討論滅蚊議題，萬一登革熱殺入元朗就要更加留心。佢同三名年幼嘅孫女一齊住喺村屋，一講起孫女就甜笑，直言最錫呢三個「金叵羅」，所以依家會幫佢哋多噴蚊怕水，又盡量將佢哋留喺室內，唔好出去花園玩，避免餵蚊。
香港各界商會聯席會議秘書長沈運龍（Aaron）一向鍾意喺屋企及公司露台種植物，自然會惹蚊，佢嘅驅蚊心得就係噴殺蟲水，仲會種香茅、九層塔及薄荷草等植物香料，一來可以防蚊，二來因為太太鍾意煮嘢食，可以隨時摘嚟炮製美食，一舉兩得。講到被蚊咬嘅經歷，Aaron笑稱自己一向唔惹蚊，可能係啲血毒過頭喎，真係識講笑。
卓妮