市道慘淡 商戶抱怨滅蚊不力
【本報訊】受登革熱疫情影響，長洲變得冷冷清清，政府雖實施全島滅蚊，但商戶慨嘆人流及生意額銳減，市道慘淡。其中售賣帽及玩具的商戶呂太稱，自登革熱出現後，人流減少八成，生意額下降八成，並說：「人流少晒，生意影響好多好多。」惟她不見有政府人員來滅蚊，認為政府加強滅蚊，待登革熱零個案，才能恢復人流帶動生意。
另一名商戶林女士亦指出，人流明顯少了一半，「登革熱前生意都是一般，依家生意比一般更差。」她希望全島滅蚊政策帶動生意，「等市民唔使咁驚，以為長洲似疫區。」希望待一至兩星期後登革熱減少，生意有轉機。
遊客做足防蚊措施
至於到長洲的旅客黃小姐稱，不擔心有登革熱，因為有噴蚊怕水，但批評政府全島滅蚊「得個講字」，坦言：「即使新聞都講晒，但依家又唔見佢哋做嘢，搞到大家仲擔心。」
另一名旅客陳太表示，雖擔心登革熱，但由於人流少，笑言：「一家人容易租房住」。她與家人會做足防蚊措施，帶充足蚊貼、驅蚊劑、驅蚊包，並說：「我哋就係貪無咁多人先嚟。」
