政情：小太空人認真玩體驗營 梁偉明爆因要考試
雖然求學不是求分數，但要考試都一定會令人緊張啲。香港太空館館長梁偉明出席少年太空人體驗營2018分享會暨十周年聚會時，講起今年嘅體驗營包括講座，同學都好認真參與，非常投入，其中一個原因係聽完要考試。現場參與嘅同學聽到館長咁講，即刻大笑，考試都笑得咁開心，睇嚟試題都唔係太深呀吓！
體驗營係由香港太空館及香港中華總商會喺七月底至八月初舉辦，共有三十名香港學生參與，行程包括去咗酒泉衞星發射中心、北京航天城等，仲同三位航天員王亞平、楊利偉同陳冬會面。
同學仔話太空衣好難着
有份參與體驗營嘅中學生鍾劍滔話，佢有份試着太空衣，原來件衫好重，又好多拉鏈，自己一個人係好難穿上嘅，都要兩人幫手至得，而且仲一度忘記開太空衣嘅風機，佢即刻熱到成身汗，塊面都紅晒添，佢話今年好好彩，有十幾二十人可以試着，往年得六至八個有份o架咋，仲大讚太空人食物中嘅牛肉好味喎，都會考慮長大後讀有關航天嘅課程咁話喎。