政情:幫街坊慳錢 楊彧變身換鎖佬

區議員平時要幫街坊解決疑難雜症,經常都周身刀,幫手通渠就聽得多,換鎖又聽過未?深水埗區議員楊彧近日就練成換信箱鎖嘅秘技,四個鐘之內可以行勻十二棟樓,換咗五十五個鎖添,認真犀利!

買唔同信箱鎖練習

點解冇啦啦要練換鎖秘技?楊彧話早排有街坊嘅信箱鎖壞咗,搵房屋署換竟然索價三百蚊,所以街坊就向佢求助。佢同房署交涉後,對方仍然企硬要收三百蚊,佢靈機一動,不如試吓自己郁手囉!於是佢自己買唔同嘅信箱鎖去試,仲請教埋師傅、搵相熟嘅街坊畀佢試吓,真係練成開鎖技術,先夠膽幫個街坊換。

點知唔少街坊收到風,都話自己個鎖開得唔順暢,所以楊彧就索性出海報幫街坊換,每個只係收番十蚊,結果超過二百五十個街坊報名。佢話建制派見狀,即刻有樣學樣,仲唔收錢添。唔知咁樣係咪叫做「以本傷人」呢?

第一手消息請下載on.cc東網iPhone/iPad/Android/Windows Phone Apps