中環出更：白鴿眼齊出事 尹兆堅黃碧雲同病相憐
早排立法會資訊科技界議員莫乃光患上突發性失聰，好彩好快就康復。不過，民主黨（白鴿黨）兩名立法會議員對眼都有事，其中一人更加要做手術添！講緊嘅係尹兆堅（肥尹）同埋黃碧雲（一舊雲）吖！
均有飛蚊症 一舊雲要做手術
一舊雲一向有飛蚊症，經常見到黑點或浮游物，好似有蚊飛來飛去。佢喺立法會休會前發現右眼睇嘢較以往矇，以為近視度數加深，驗眼後先知係黃斑病變及眼底撕裂。一舊雲笑稱，患有飛蚊症多年，已經習慣睇嘢唔係咁清楚，但都冇諗過咁大件事。月底佢會做手術更換眼球晶體兼修補撕裂，之後有兩星期要趴喺床上，仲有段時間唔可以搭飛機添！
肥尹就喺六月立法會審議一地兩檢時，因叫囂而被保安抬出會議廳，當日曾受傷入院檢查。約一星期後，肥尹左眼睇嘢有黑點，醫生證實係飛蚊症，醫生話可能係受到撞擊造成，但肥尹就話無意怪責保安喎。佢話開頭唔慣，會不斷搖頭或郁眼球，之後慢慢唔郁等啲黑點沉底就好啲，醫生仲叫佢半年內都唔好做劇烈運動喎。
卓妮