曾幾何時，香港人有「屋仔、車仔、老婆仔、BB仔」嘅「四仔主義」，可惜今時今日早就冇呢支歌唱，事關特衰政府無能到冇朋友，各項政策天殘地缺，呢頭話人口老化海嘯殺到，猛落嘴頭氹人生BB，嗰頭咩支援措施都冇，連幼兒中心供應都遠遠不足，係鼓勵生育定阻嚇生育，大家心照喇。
對於香港託兒配套僧多粥少，港府一直詐傻扮懵，勞福局局長羅致光尋日終於鬼拍後尾枕，承認日間育嬰園由二十多年前逾千五個名額，跌到依家得番七百四十個左右，家陣物色緊地方起幼兒中心嚟「追落後」，預計未來兩年增加三百個名額喎。佢仲話，面對香港生育率下降，每個孩子都係「一個也不能少」，協助有意生BB嘅市民減輕育兒壓力，係勞福局未來重點。講到咁偉大，真係信者得「咎」呀。
係人都知，政府早幾年猛叫人「生三個」、「生夠一隊籃球隊」，妄想香港變身千萬人口大都市，結果又係吹水唔抹嘴，講咗當做咗。依家全港三歲以下幼兒有十幾萬，資助幼兒中心名額得七百幾個，未來兩年莫講話增加三百個名額，增加三千個都唔掂啦。仲有，名額本來就少得可憐，仲要雨露不均，全港十八區有六個區份冇幼兒中心，唔少女士坦言託兒服務不足，情願唔生或者減少生育，官老爺聽到未呀！
更好笑嘅係，政府鼓勵生育嘅同時，又話香港缺少勞動人口，要釋放婦女勞動力，即係鼓勵媽媽重返職場，現實係唔少媽媽因為冇託兒服務幫手睇住個BB，而要焗住全職湊仔，重返職場？官老爺講就輕鬆，本港婦女勞動力參與率只得五成，低過其他地區，就係咁解。
諗起都可悲，香港每名婦女平均生育一點一二六名嬰兒，比率排全球尾四，仲低過澳門同新加坡。當然喇，香港人並唔係唔想生，而係唔敢生，你知喇，香港房屋、教育、醫療瓣瓣唔掂，生活壓力沉重，好多年前「風之后」李麗珊已經大大聲話，湊大個BB要儲足四百萬，有幾多家庭有咁嘅能力吖。第樣唔使講，淨係房屋問題愈演愈烈，劏房都成可居奇貨，學啲激進年輕人話齋，連「搞嘢嘅地方都冇」，生兒育女喎，諗都唔使諗。
睇到啦，港府連增加幼兒中心咁簡單嘅嘢都做唔到，仲話鼓勵生育，盞嘥氣嘅啫。生育率長期低落，缺少新鮮血液同朝氣，成個社會只會愈嚟愈老氣橫秋。夕陽無限好，只係近黃昏，香港人口縮吓縮吓，終有一日縮到好似古代個樓蘭小國咁，變成無人荒島，到時就乜治港問題都冇晒啦。