政情：楊偉雄推創科無定位 獨角獸當政績

「獨角獸」係指成立不足十年、估值達十億美元以上嘅初創企業。楊偉雄喺網誌就話，全世界都積極擁抱創科，成熟經濟體如英國推出發展戰略以推進倫敦的金融科技中心地位，法國就致力打造巴黎成為歐洲人工智能（AI）重鎮等。喺創科大潮嘅新時代中，各國各地都以Hi-tech促進經濟及社會發展。

佢又話，香港喺過去短短數年才開始發力推動創科，已誕生咗最少兩隻「獨角獸」，數目可媲美法國、日本及新加坡，相信未來一兩年將會有更多「獨角獸」出現。楊又話，資訊科技、電訊及科技產業嘅全職畢業職位空缺最多，顯示Hi-tech人才需求高、待遇好，有更多「撈嘢」機會。

莫乃光：政策應以民生就業環境考量

不過資訊科技界立法會議員莫乃光回應話，未聽過以所謂「獨角獸」嘅數目評價政策成效，都唔相信呢個係適當指標，因為涉及太多財技因素。政策嘅成敗應以改善巿民生活、創造優質就業環境為考量。

香港資訊科技商會榮譽會長方保僑（Francis）都話，雖然有「獨角獸」喺香港出世，但湊大佢哋嘅資金通常都唔會來自單一地方，更重要嘅係港府點樣製造環境畀創科公司發展。佢仲話，港府嘅政策一向唔聚焦，一時做生物科技，一時又搞大數據，樣樣都想做，結果每樣嘢都只做一忽，定位唔夠清晰。佢認為香港資源不足，唔應該乜都做。

至於人才，Francis就慨嘆，一直唔夠本地創科人員，早些年學生見唔到有出路，個個走去讀銀行同做地產，所以應該由源頭做起，教育局同創科局應加強合作，如果只想靠輸入外地人才，就會好似踢波搵外援一樣，始終留唔住。

本地創科發展起步慢，支援又唔足夠，環境未盡完善，令到樣樣嘢都做啲唔做啲，真係難為楊偉雄見到「獨角獸」如獲珍寶，攬住當政績。咪以為做個「佛系局長」，時間到了，「獨角獸」就自然會出現。講咁多，不如用心思考吓業界聲音，做多啲配套支援仲好喇。