中環出更：盧金榮談舊戲院 最掛住燒魷魚
「丑生王」梁醒波今年誕辰一百一十周年，有戲院喺今個月會播放其一系列經典電影，向呢位喜劇大師致敬，早前更搞咗一場放映禮，吸引唔少名人到場欣賞。包括中華廠商聯合會副會長盧金榮、香港餐飲聯業協會青委主席陳浩弘及立法會前議員劉慧卿等，梁醒波嘅孫仔梁智宏當然唔可以缺席喇。
香港人鍾意睇電影作消遣，不論早場定午夜場都一樣有捧場客。唔少人嘅童年回憶都同睇戲有關，好似盧金榮細細個就跟父母睇戲，佢話最掛住舊式戲院門外嘅燒魷魚，而且每次去戲院都會去磅重，最開心就係磅完重後有張磅重卡，好得意。依家戲院嘅設備及環境提升咗，不過盧金榮就話鍾情舊戲院多啲，因為以前嘅戲院面積大，一齊睇戲嘅人多過依家好多，而且更會細分前座、後座等等，所以睇戲都覺得好熱鬧。
陳浩弘唔介意獨自睇戲
劉慧卿年幼時就靠家姐帶佢去睇戲，由於當時家住油麻地，所以經常幫襯已被列為歷史建築物嘅油麻地戲院。佢笑言好鍾意睇戲，即使去咗美國讀書都繼續睇。但係做咗議員後，時間放晒落議會就少咗入戲院喇！
至於陳浩弘最近先同小朋友入戲院睇卡通，佢話以往父母工作忙碌，童年唔係經常去睇戲，反而升中學先開始同朋友出街睇戲。依家如果唔使陪小朋友睇戲時，佢就會選擇動作片，都唔介意自己一個人入場添！點解唔同太太一齊睇戲呢？佢就笑住話，太太要視乎男主角係邊個先會入場喎。
卓妮