都話律政司同個「九」字有緣，對住壹淫媒漢奸黎固然沒有最肉酸，只有更肉酸，庇奸護淫出晒面，堪稱係玉皇大帝第九個孫。就連正義傳媒去信追問漢奸黎恐嚇東方記者案，律政司亦要拖到第九封信至肯開綠燈畀警方做嘢。以律政司嘅「玉九孫」作風，綠燈開完會唔會又變成紅燈，搞到正義傳媒好似忠臣岳飛冤死風波亭咁，冤死老襯亭，真係要睇過至知。
呢嗱，漢奸黎舊年「六四」粗口辱罵兼涉嫌刑事恐嚇東方報業集團記者，「×你老母×」、「我實會搵人搞×你」、「我影×咗你嘅相」，字字鏗鏘，句句兇狠，仲要有相有片鐵證如山，完全冇得抵賴。點知一件黑白分明、毫不複雜嘅案件，拖拉超過一年，律政司仲係唔嗲唔吊，東方先後多次去信質詢檢控進展，律政司唔係裝聾作啞兼扮盲，就係講虛話、廢話。忍無可忍，毋須再忍，東方日前第九度去信，繼將副本抄送中聯辦、港澳辦及特首辦後，再送多次畀特首辦兼畀埋申訴專員公署，可能律政司終於知衰啩，指示警方向漢奸黎錄口供，總算係正義傳媒行咗九大步，律政司行番一小步喇。
睇到喇，出到第九封信先至有成效，擺明一直有人阻頭阻勢、阻差辦公喇，唔知嘅仲以為律政司想學岳飛，要出動十二面金牌至叫得佢郁，你話唔係「玉九孫」係乜吖！試諗吓，若然唔係正義傳媒鍥而不捨堅持討回公道，發揮第四權將律政司不公不義、姑息養奸嘅醜陋面目公諸於眾，社會嘩然，輿論沸騰，呢單畸士會開綠燈至奇。不過咁，正如蠢人唔會認自己蠢，做漢奸唔會認賣國，要漢奸黎呢啲反中亂港、惡貫滿盈嘅契弟認罪，真係唔使旨意。據聞契弟喺律師陪同下已經去咗錄口供，到底呢單畸士結局係點，漢奸黎會唔會被繩之以法，一直提心吊膽嘅受害記者有冇安樂日子過，拭目以待喇。
講起受害記者嘅遭遇，真係一殼眼淚。自從被漢奸黎惡形惡相喊打喊殺後，冇覺好瞓不特止，成日擔心被人跟蹤先至最大鑊，仲慘到要睇精神科醫生添。喂，漢奸黎作為傳媒老闆，平時滿口仁義道德，竟然做出踐踏新聞自由兼恐嚇記者嘅暴行，簡直天地不容，呢啲係乜嘢民主鬥士呀？咁當然，漢奸黎之所以氣燄囂張打橫行，都要多得律政司長期縱容包庇。淨係政治黑金案咋，收錢嘅長毛獲官老爺放生，畀錢嘅契弟直情連審都唔使審，就知乜料喇。都未講佔中案嗰筆，一時「證據不足」，一時「證據太多」，漢奸黎出錢出力指揮策劃依然毫髮無損。大大把司法保護傘撐腰咯喎，恐嚇東方記者案即使提上法庭，恐怕又係畀人搵老襯嘅咋。
有辦你睇，好似年前另一宗恐嚇東方記者案吖，被告揚言點咗相，又話要搵人斬記者，幾惡呀，點知上到法庭啫，裁判官竟然話「得唔到由控方提供嘅現場閉路電視錄影片段支持」，將被告當庭釋放。所以話，若然漢奸黎單刑恐案又玩捉放曹，真係一啲都唔出奇o架。
大家有眼睇，回歸廿一年來，正義傳媒本住愛國愛港嘅心，秉持公義發聲，換來嘅竟然係政府唔同部門輪番登門滋擾，羅織嘅罪名仲要千奇百怪，層出不窮。雖然呢啲所謂投訴每次都證實唔成立，但已令人煩不勝煩。反觀反中亂港嘅壹淫媒，多年來公器私用，勾結外部勢力搞風搞雨，偏偏呢個政府唔取締、唔打壓，加倍愛錫唯恐不及。你話喇，喺香港特區一國兩制、港人治港下，愛國愛港傳媒受到咁嘅對待，得到咁嘅遭遇，呢個到底係乜嘢畸形政府吖！
冇計嘞，反中亂港有後台，愛國愛港買棺材，就係今日香港嘅荒謬寫照。好似港獨小頭目有外國記者會撐腰，漢奸黎又有外部勢力支持，搞乜都冇事，愛國愛港者想唔買定棺材都唔得。今次正義傳媒會唔會冤死老襯亭，大家記住放長雙眼睇清楚。點都好，決不能輕輕放過漢奸黎，港產官僚若然膽敢胡作非為，肆意打壓第四權，唔止係同正義傳媒為敵，直情係與民為敵。下場就係同秦檜像一樣，跪埋落地，受盡萬民唾棄！