政情：林鄭玩Fb直播 吸嬲逾三千
行政長官林鄭月娥尋晚喺社交平台Facebook搞直播，話想聽吓市民對施政報告嘅意見，不過短短約四十八分鐘嘅直播之後，喺四千四百個網民畀嘅表情符號之中，「嬲嬲」佔咗近三千三百個，「吸嬲」比率高達七成半。唔少網民就批評林鄭揀問題回應，避開難答嘅問題。
被指避答不利問題
林鄭喺直播中答咗廿幾條問題，部分問題聲稱係預早收集嘅網民意見，再臨場由主持人抽出；另一部分問題就係由主持人喺直播期間嘅留言中揀出。不過，網民就唔多滿意安排，其中社民連副主席黃浩銘就留言鬧林鄭「抽晒啲有利自己嘅問題，避答即時問題」，本土派劉頴匡亦話「成個live（直播）得佢講無網民講」。
至於獲抽中嘅網民唔少都希望削減每日一百五十個嘅內地單程證名額，林鄭就話︰「可能最近有人好成功咁同大家洗咗腦」，又稱房屋單位供應緊張同樓價高昂與單程證無關，反指好激進嘅青年人，父母同其本人亦可能係透過單程證來港，話新移民不應受排斥。至於網民Charles Lam問「幾時炒陳帆魷魚」等嘅題目，就冇被選中。