政情:羅冠聰稱搞登機遭留難國泰跪低致歉

曾參與違法佔領行動(佔中)嘅香港眾志常委羅冠聰,之前投訴過話自二○一四年佔中後,不時都被航空公司國泰留難,乘搭該公司航班時辦理登機手續所需嘅時間一次耐過一次。羅仲去信國泰,要求佢哋解釋。國泰尋日就覆信向羅致歉。

要求交代列入名單原因

話說日前羅喺台灣乘國泰航班返港,喺台灣機場辦理登機手續,搞咗成半個鐘,佢仲「真心失望」到話要呼籲身邊啲人唔好搭國泰。國泰尋日就覆信畀羅,話明白羅對最近嘅經歷感到不滿,就服務未能達到羅嘅期許致歉。但對於羅所指嘅「乘客名單」,國泰就只話係根據有關當局嘅指引作業,未能評論喇,但佢哋已作內部檢討,希望改善羅將來辦理登機手續嘅時間。

不過,羅對國泰嘅答覆似乎唔多滿意,仲質疑國泰所指嘅「當局」係保安局定機場管理局,又要求國泰交代將其列入名單嘅原因,同說明有冇相關剔出名單嘅機制。

第一手消息請下載on.cc東網iPhone/iPad/Android/Windows Phone Apps