政情：沙田區會搶閘踩過界譴責FCC
香港外國記者會（FCC）邀請香港民族黨召集人陳浩天出席午餐會演講「播獨」，建制派當然狂轟。其中沙田區議會前日就要求區議員聯署譴責FCC，出手仲快過FCC會址所在嘅中西區，到底點解呢？
沙田區議員趙柱幫透露，收到沙田區議會主席何厚祥嘅電郵，邀請區議員加入「強烈譴責FCC支持協助『港獨』勢力煽動分裂國家行為」嘅聯署聲明，而聲明嘅抬頭係「新界區議員」；內容係指FCC唔理勸告，一意孤行邀請港獨分子發表演講，協助煽動分裂國家。趙話，新界九個區議會嘅主席會發表呢個聯署，而何與沙田區議會副主席彭長緯更已經簽咗名。
稱聯署屬自願性質
FCC位處中西區，但中西區區議會至今都未見有任何行動，反而隔住維港同九龍嘅新界區率先發功。何厚祥就話，因為對FCC做法感到不忿，所以發起聯署，又話聯署屬於自願性質喎。