政情：瑞士開會被斥Hea答 陳帥夫外訪玩埋法國
不論立法會議員定係港府官員，無論喺香港定外訪，一舉一動都受到公眾監察。政制及內地事務局副局長陳帥夫早前就代表香港到瑞士日內瓦出席聯合國消除種族歧視委員會會議，但被以非政府組織身份出席嘅前立法會議員劉慧卿（卿姐）鬧爆，狠批陳喺會議上嘅表現令人失望，仲踢爆陳喺外訪期間去咗法國玩添！
呢個委員會係檢視中國、香港及澳門嘅人權紀錄，今次就分開兩個會議，分別喺上周五及本周一舉行，由陳帥夫帶隊嘅港府代表團，就要喺周一嘅會議上答辯。同時，卿姐就聯同香港人權監察總幹事羅沃啟、香港融樂會等多個組織一行十幾人以非政府組織身份出席會議，實行監察港府代表團表現。
文件資料過期 被斥最差團隊
尋日卿姐召開記者會，鬧爆港府代表團喺會議上答非所問，冇就委員提問作詳盡解釋，求求其其咁回應問題之餘，仲叫委員睇完書面回應先再提問。羅沃啟就鬧爆港府代表團表現離晒譜，仲形容係最差嘅團隊，事關一直都冇公開份書面回應，後來睇番先發現份文件喺今年六月出過，啲資料完全冇更新過。
卿姐鬧爆 促政府開記招交代
鬧完開會表現，之後卿姐就踢爆，話喺答辯會議前一日同部分成員去法國阿爾卑斯山沙莫尼勃朗峰（Chamonix Mont Blanc）旅行期間，喺旅遊巴士上就撞見陳帥夫同姨甥女一齊，而對方仲話係做完嘢先決定去玩，點知翌日（周一答辯會議）就表現咁差，所以要求政府開記者會交代今次開會情況。
據了解，港府代表團在周一答辯會議上提供書面回應外，亦有指陳帥夫已答晒在場所有提問；至於周日去法國旅行一事，有人就話周日係私人時間，無影響公務，亦不涉及公帑，而陳一直與局方保持溝通喎。其實立法會議員外訪，好多時會早到或遲走去遊玩，但就唔會中途走咗去玩囉，今次陳中途去玩仲要斷正畀卿姐，都唔好怪人踢爆喇！