中環出更：吳鄭慧賢管理7工人嘆難過湊B
商界助更生委員會（助更生）早前舉行就職典禮，香港福建社團聯會主席吳良好個仔吳志龍（Chris）同佢啱啱生完孖女兩個月嘅太太吳鄭慧賢（慧慧）都有到場，事關Chris係助更生名譽會長，所以暫時放低五名子女出嚟支持吓。五名子女最大都只係四歲，問慧慧湊得辛唔辛苦，佢笑笑口話還可以，因為屋企有七個家傭，實行一對一咁湊，但佢就覺得管理工人仲辛苦過管小朋友喎。
慧慧解釋話，請七個工人係因為要一個工人湊一個小朋友，另外仲要有兩個工人負責做家務。佢笑稱自己只係廿四歲，但要處理幾名工人之間爭風呷醋，甚至嘈交等複雜嘅人際關係，真係好難。不過佢覺得自己都學到好多嘢，係「慢慢長大緊」添。聽落真係幾頭痕，相信吳良好都要講聲「難為了家嫂」喇。
彭詢元話專幫懲教署趕客
懲教署前署長彭詢元當日都有到場，佢退休後仍熱心公益，現任助更生永遠名譽會長。佢話助更生係佢喺懲教署署長任內，由一班熱心人士成立，佢當然要支持。佢仲形容自己依家專幫懲教署「趕客」，事關佢身兼香港遊樂場協會主席，重點做青少年工作，預防佢哋誤入歧途。
懲教署署長林國良都有現身，助更生會長郭純恬及主席麥家榮就忙於招呼賓客。林國良話，有賴於社會各界扶助更生人士，香港嘅重犯率低至兩成幾，節省因犯事而引致嘅社會成本高達一百五十一億元，數字令人鼓舞。
同場仲有仁愛堂前副主席陳鑑光（Charles）及太太陳鄭玉而。Charles好雀躍咁話最近去咗外國參加幾場婚禮，其中一場喺英國嘅博物館舉行，感覺好新鮮，又不失莊嚴，諗起都意猶未盡咁話。
卓妮