野火燒不盡，春風吹又生。功夫茶唔係咁有閒情逸致吟詩唸詞，而係講緊臭名昭著、位於深水埗通州街天橋底嘅南亞村，日前一場大火，南亞村幾乎收皮，點知畀港府縱容嘅春風吹一吹，唔單止死灰復燃，毒品交易等非法活動仲變本加厲添！
呢，東網記者尋日朝早就去直擊南亞村村民毒品交易過程。呢班大帝分工仔細，有人負責睇水做「天文台」，有人負責做Sales喺街派飲管兜客，可以話係各司其職，效率比政府部門高多多聲。眨吓眼就見有六名男子喺木板屋度「開餐」，有人吔完「早餐」行出屋，仲係迷吓迷吓，有人就攤喺屋外休息。光天化日都可以「上電」上得咁大模廝樣，唔講仲以為拍緊戲。
真係諗極都唔明，南亞幫公然進行毒品交易，記者睇到，居民睇到，政府冇可能睇唔到，分明埋個頭落沙堆扮睇唔到嘅啫。講真，取締南亞村，港府想做嘅話一定做到，不過學林鄭嗰句金句話齋：「你瞇埋眼咪睇唔到囉！」唔怪得咁耐以嚟，班廢官都係無動於衷啦。
港府高官最鍾意周圍同人講，保留反對派係體現一國兩制嘅特色，照咁睇，保留南亞村肯定係一國兩制嘅另一特色。就講上個禮拜南亞村畀人縱火，政府係就係出動民政事務處、食環署、社署去拆屋，弊在淨係求其清幾間燒咗嘅木屋就算，港府唔趁機大腳清走呢個治安毒瘤，斬草除根，反而養虎遺患，同官老爺平時對付弱勢基層嗰種蝦蝦霸霸形成鮮明對比，講到尾咪就係欺軟怕硬，欺善怕惡！
大家睇到啦，南亞村經歷警方掃蕩及火災仍然屹立不倒，與其話本身生命力旺盛，不如話係港府姑息縱容。所謂賊佬試沙煲，南亞幫知道港府驚咗佢哋，自然鬆毛鬆翼變本加厲，一個通州街天橋底又點可能滿足佢哋胃口？香港咁多天橋底，睇怕遲早都係佢哋嘅地盤，玩吓手若干年後申請埋逆權侵佔都有之。南亞幫喺度落地生根，繁衍壯大，遲啲做埋區議員、當選立法會議員，甚至宣布從香港獨立，成立南亞共和國，一啲都唔出奇。
你知啦，構成現代民族國家嘅四大要素係共同地域、經濟、語言同文化，乜鬼「香港民族黨」就話吹水啫，南亞幫名副其實係唔同民族、講唔同語言，天橋底係佢哋共同嘅地域，加上製毒販毒、印偽鈔以及食大茶飯等共同經濟模式，完全有條件宣布獨立成國。第時一個個天橋底變成一個個獨立王國，何止「一國兩制」，直頭「多國多制」添喇！