港鐵沙中線工程醜聞不斷，港鐵前工程總監黃唯銘上周被即炒。話雖如此，但黃仍然仲係香港工程師學會會長。近日唔少該會會員聯署，對黃嘅誠信存疑，認為佢難以領導學會，要求黃辭去學會會長，挽回公眾對工程界嘅信心。尋日有份聯署嘅資深土木工程師倪學仁就透露，其實學會只要有六十個會員，就可以啟動到公投，而短短幾日就已經有廿八人聯署，分分鐘過多幾日就夠六十個。睇嚟黃唯銘都係快啲自己走人，費事要人哋啟動公投革走咁肉酸啦！
