政情：踩單車巡區 張美雄靜脈曲張做手術
「無殼蝸牛」西貢區議員張美雄自上任後一直未有辦事處，所以要不斷踩單車巡區，當係流動議員辦事處，唔少街坊早已見慣佢着到西裝骨骨咁踩單車。不過，可能因為着皮鞋踩單車踩得多，佢隻腳出現靜脈曲張，最近入院做手術。
街坊叫向政府申醫藥費
張美雄笑稱其實好小事，只係左腳膝後喺半年前開始有靜脈曲張，經常要企街站都可能係原因之一。早排佢入院做切割手術，將冇用同增生嘅血管切除，如果唔切就要着一世壓力襪。依家只需着幾星期就冇事，佢話以後會學乖着多啲波鞋。而街坊知道之後，都怪責政府唔幫佢開辦事處，提議向政府申領醫藥費喎！
由於做咗手術，佢已有一排冇踩單車落區，加上夏天天氣太熱，怕出事，話遲吓涼啲就會再出動喇！