政情：魏麗霞身兼兩職 勁忙頂硬上
好多政商界人士都趁住暑假出外鬆一鬆，「家品女王」、香港商業專業評審中心常務副會長魏麗霞（Lisa）就飛咗美國、日本同新加坡等多個國家一轉。
雖然叉足電返港，但係遇上公司行政總裁離職，身為主席嘅佢要兼任總裁，一個人睇晒呢盤咁大嘅家品連鎖店生意，難怪佢忙到氹氹轉啦！
市場競爭大 須擴產品種類
Lisa間公司已經上咗市，原本可以請同事幫佢一齊分擔工作，但係佢笑笑口話依家市場競爭大，所以未敢鬆懈，仲話隨住時代嘅變化，傳統家庭用品店都要擴闊產品嘅種類，唔可以只係賣杯碟刀叉就算數。
最近佢哋就做埋同健康有關嘅產品，仲要大力發展手機周邊產品。無論點變都好，宗旨都係令消費者覺得便利兼抵買。
開拓網售市場係未來重點
不過香港地租金貴，店舖愈開愈細，擺唔落太多種類嘅產品似乎係零售業面對嘅共同難題。佢笑稱，所以開拓網上銷售市場係未來重點，要做到廿四小時運作，但到時佢就更加冇覺好瞓喇！