政情：商界議員補水甘 助理OT做到暈

議員可以向立法會秘書處申請發還工作開支，趁立法會放緊暑假，我哋總結議員過去一年嘅開支情況，發現有四名功能界別議員列明向加班嘅議助補水，分別係保險界陳健波、商界（第二）廖長江、工業界（第二）吳永嘉同埋地產及建造界石禮謙，清一色立場向商界傾斜嘅議員，認真估你唔到。

陳健波過去一年大部分時間都有五名助理，其中一名薪酬最低助理月薪唔過兩萬元，但佢就享有超時補水嘅待遇，如果假期需要工作，就可獲接近一百廿元時薪去計算補償；若然喺工作日超時工作，就以九十元時薪計算。過去一年，呢名助理獲補水約一萬八千元。

吳永嘉有議助月內加班19日

而吳永嘉每個月都會發放超時補水，不過並唔係所有議助都需要超時工作，每個月都只係一至兩個議助需要加班。佢計算補水嘅方法係以每日時薪嘅兩倍或者一倍半計算，其中一名潘姓助理喺今年五月就超時工作四十一個鐘頭，一個月內有十九日需要加班，最長試過加班三個半鐘先收工，即做到晚上九時半，認真辛苦。而呢名議助喺該月就有超過五千蚊嘅補水，大約係其基本月薪嘅四分一。

廖長江議助超時工作89個鐘

不過，加班四十一個鐘都並非最嚴重，廖長江嘅議助先係超時工作最多，佢每個月都要花過萬元作為超時補水，成為議會之最，唔知係咪因為身兼建制派班長，工作量特別多呢？超時情況最嚴重嘅月份就係上年十二月，六名議助有四人需要加班。

廖有一名議助超時工作情況特別嚴重，由上年九月起計算，每個月至少都要超時工作七十五小時，最嚴重係上年十一月份，要超時八十九小時。唔知係咪本身訂明嘅工時太短，先搞到要超時咁多？

其他議員就未有列明有超時補水，唔知佢哋議助嘅超時工作情況，都有機會係有超時、冇補水。希望真相唔係咁喇！